فورۋمدا قوستاناي وبلىسى اكىمىنىڭ ورىنباسارى مەيىرجان مىرزاليەۆ ءوڭىردىڭ ينۆەستيتسيالىق الەۋەتى جونىندە ايتىپ بەردى. ول الدىمەن جۇرتتتىڭ نازارىن وبلىستاعى ينۆەستيتسيا تارتۋ كورسەتكىشىنە اۋداردى. بيىل جىل باسىنان بەرگى 8 ايدا وبلىستاعى نەگىزگى كاپيتالعا 113 ميلليارد تەڭگە ينۆەستيتسيا تارتىلعان. بۇل وتكەن جىلدىڭ وسى مەرزىمىمەن سالىستىرعاندا 11,5 ميلليارد تەڭگەگە كوپ.
«وبلىستاعى وڭدەۋ ونەركاسىبىنە سالىنعان ينۆەستيتسيا كولەمى 2,2 ەسە ءوستى. مۇنىڭ سىرتىندا 285 ميلليارد تەڭگەنى قۇرايتىن 16 ءىرى جوبا جۇزەگە اسىرىلۋدا, وندا 2 مىڭ جۇمىس ورنى اشىلدى» دەدى مەيىرجان ۇياباي ۇلى.
فورۋمدا ينۆەستيتسيا جانە دامۋ ۆيتسە-ءمينيسترى ەرلان حايروۆ, مادەنيەت جانە سپورت ۆيتسە-ءمينيسترى اسقار باتالوۆ, اۋىل شارۋاشىلىعى مينيسترلىگىنىڭ جاۋاپتى حاتشىسى ەرمەك كوشەرباەۆ, دۇنيەجۇزى بانكىنىڭ جەكە مەنشىك سەكتوردى دامىتۋ مامانى ەرالى بەكسۇلتان, ازيا دامۋ بانكى وكىلدىگىنىڭ ديرەكتورى دجوۆانني كاپانەللي, تاعى باسقالار سويلەپ, قازاقستانداعى ينۆەستيتسيالىق قولايلىلىق جانە ينۆەستيتسيا تارتۋدىڭ ماسەلەلەرىن ورتاعا سالدى.
فورۋمنىڭ پلەنارلىق ءماجىلىسىن وبلىس اكىمى ارحيمەد مۇحامبەتوۆ قورىتىندىلاپ, ونىڭ جۇمىسىنا قاتىسقاندارعا راحمەت ايتتى. پلەنارلىق ماجىلىستەن كەيىن الەۋەتتى ينۆەستورلار مەن قوستاناي وبلىسى اراسىندا 26 مەموراندۋمعا قول قويىلدى.
ءنازيرا جارىمبەت,
«ەگەمەن قازاقستان»
قوستاناي
